فتوی نمبر : 406
لہسن کی مقدار کم نکلنے کی صورت

لہسن کی مقدار کم نکلنے کی صورت

کیا فرماتے ہیں علماء کرام اس مسئلے کے بارے میں کہ بایع نے مشتری کو چار ہزار کلو لہسن دیا مشتری نے آدھے سے زیادہ قیمت بھی ادا کی مشتری نے بایع سے لہسن وصول کی اور راستے میں کسی کانٹے پر لہسن کو تولا اور اس کے بعد بایع کو فون کی کہ اس کا وزن کم ہے اب اس میں ایک سال گزر چکا ہے بایع بار بار پیسوں کا مطالبہ کرتے ہیں اور مشتری اب کہتا ہے کہ اس کا وزن کم تھا اور ابھی ریٹ بھی گر چکا ہے لہسن کا میں بقیہ پیسے نہیں دے سکتا اس کے بارے میں شریعت کا کیا حکم ہے؟

اَلجَوَابْ بِاسْمِ مُلْہِمِ الصَّوَابْ

پوچھی گئی صورت میں اگر بائع(بیچنے والا) دعویٰ کرتا ہے کہ لہسن چار ہزار کلو پورا تھا تو اس پر لازم ہے کہ اس پر کوئی ثبوت یا گواہ پیش کرے اور اگر وہ گواہ پیش نہ کر سکا تو مشتری (خریدار) پر قسم لازم ہوگی، اگر مشتری قسم اٹھا لے کہ لہسن چار ہزار کلو سے کم تھا تو مشتری پر اس کے بقدر قیمت لازم ہوگی، لیکن اگر مشتری قسم سے انکار کر دے یا بائع ثبوت پیش کر دے تو دونوں صورتوں میں مشتری پر لہسن کی پوری قیمت لازم ہوگی۔
بہرحال اس میں بہتر یہ ہے کہ کسی انصاف پسند اور تجربہ کار شخص کو منصف بنا کر اس سے اپنا فیصلہ کروا لیا جائے ۔

حوالہ جات

*مرقاة المفاتيح شرح مشكاة المصابيح :(6/ 445)*
عَنْ عَمْرِو بْنِ شُعَيْبٍ عَنْ أَبِيهِ عَنْ جَدِّهِ أَنَّ النَّبِيَّ - صَلَّى اللَّهُ عَلَيْهِ وَسَلَّمَ - قَالَ: " الْبَيِّنَةُ عَلَى الْمُدَّعِي، وَالْيَمِينُ عَلَى الْمُدَّعَى عَلَيْهِ " رَوَاهُ التِّرْمِذِيُّ.

*الشامية :(4 / 542،ط: دارالفکر)*
"(وإن باع صبرةً على أنها مائة قفيز بمائة درهم وهي أقل أو أكثر أخذ) المشتري (الأقل بحصته) إن شاء (أو فسخ)؛ لتفرق الصفقة، وكذا كل مكيل أو موزون ليس في تبعيضه ضرر. (وما زاد للبائع) لوقوع العقد على قدر معين".