عضو هيئة كبار العلماء
السؤال
محترم مفتی صاحب! گزارش ہے کہ ہمارے علاقے کے ایک محلے میں تقریباً چالیس سال سے ایک مسجد قائم ہے۔ یہ مسجد اہلِ سنت والجماعت (بریلوی مسلک) کی ہے اور اس مسجد کے امام صاحب بھی اسی مسلک سے تعلق رکھتے ہیں، اس مسجد میں گزشتہ تقریباً چالیس سال سے اہلِ حدیث، دیوبندی اور بریلوی مسلک سے تعلق رکھنے والے افراد باقاعدگی سے نماز ادا کرتے چلے آ رہے ہیں۔ اہلِ حدیث اور دیوبندی حضرات بھی اسی مسجد کے امام صاحب کی اقتدا میں نماز پڑھتے ہیں، اب تقریباً چھ سات دن قبل، یعنی 2 تاریخ کو، اسی محلے میں اہلِ حدیث مسلک سے تعلق رکھنے والے ایک بچے کا انتقال ہوگیا، مرحوم بچے کے اہلِ خانہ نے مسجد کے امام صاحب (قاری صاحب) سے درخواست کی کہ آپ تشریف لا کر ہمارے بچے کی نمازِ جنازہ پڑھا دیں، اس پر امام صاحب نے نمازِ جنازہ پڑھانے سے انکار کرتے ہوئے یہ بات کہی کہ:"اگر میں اہلِ حدیث مسلک سے تعلق رکھنے والے اس بچے کی نمازِ جنازہ پڑھاؤں گا تو میرا نکاح ختم ہو جائے گا۔" حالانکہ اہلِ حدیث حضرات گزشتہ تقریباً چالیس سال سے اسی مسجد میں نماز ادا کرتے آ رہے ہیں اور اسی امام صاحب کی اقتدا میں نماز بھی پڑھتے ہیں۔ اب محترم مفتی صاحب سے درج ذیل امور کے بارے میں شرعی رہنمائی مطلوب ہے: 1) کیا اہلِ حدیث مسلک سے تعلق رکھنے والے مسلمان بچے کی نمازِ جنازہ پڑھانے سے بریلوی مسلک کے امام کا نکاح ختم ہو جاتا ہے؟ 2) کیا کسی دوسرے مسلک سے تعلق رکھنے والے مسلمان کی نمازِ جنازہ پڑھانا شرعاً ناجائز ہے؟ 3) کیا محض کسی اہلِ حدیث شخص کی نمازِ جنازہ پڑھانے سے امام صاحب کے نکاح کے ختم ہونے کا کوئی شرعی حکم موجود ہے؟ 4) اگر امام صاحب نے یہ بات کہی ہے تو کیا اس بات کی شرعی طور پر کوئی بنیاد ہے؟ براہِ کرم قرآن و سنت اور فقہِ حنفی کی روشنی میں وضاحت فرمائیں۔ براہِ کرم اس مسئلے کا مدلل اور واضح جواب عنایت فرمائیں، تاکہ عوام میں پائی جانے والی اس غلط فہمی کو دور کیا جا سکے۔جزاکم اللہ خیراً۔
اَلجَوَابْ بِاسْمِ مُلْہِمِ الصَّوَابْ
واضح رہے کہ اہلِ حدیث مسلک سے تعلق رکھنے والے افراد، جب تک ان سے کوئی ایسا عقیدہ یا عمل ثابت نہ ہو جو شرعاً موجبِ کفر ہو، مسلمان ہیں ، محض فقہی یا مسلکی اختلاف کی بنا پر انہیں دائرۂ اسلام سے خارج نہیں سمجھا جا سکتا ، لہٰذا ان کی نمازِ جنازہ پڑھنا شرعاً درست ، بلکہ باعث اجر و ثواب ہے۔ پوچھی گئی صورت میں اہلِ حدیث مسلک سے تعلق رکھنے والے مسلمان بچے کی نمازِ جنازہ پڑھانا شرعاً درست تھا اور اس کی نمازِ جنازہ پڑھانے سے امام صاحب کا نکاح ہرگز ختم نہیں ہوتا، کیونکہ نکاح کے ختم ہونے کے شرعی اسباب متعین ہیں اور کسی دوسرے مسلک سے تعلق رکھنے والے مسلمان کی نمازِ جنازہ پڑھانا ان اسباب میں شامل نہیں، لہذا امام صاحب کا یہ خیال شرعاً بے بنیاد اور غلط ہے۔ امام صاحب کو چاہیے تھا کہ مسلمان بچے کی نمازِ جنازہ پڑھانے میں تعاون کرتے اور مسلکی اختلاف کو اس شرعی فریضے کی ادائیگی میں رکاوٹ نہ بناتے۔
المعجم الكبير للطبراني: (12/ 447، رقم الحديث : 13622،ط: مكتبة ابن تيمية ) عن ابن عمر، قال: قال رسول الله صلى الله عليه وسلم: " صلوا على من قال: لا إله إلا الله، وصلوا وراء من قال: لا إله إلا الله " بدائع الصنائع :(1/ 311، ط: دار الكتب العلمية ) وأما بيان من يصلى عليه فكل مسلم مات بعد الولادة يصلى عليه صغيرا كان، أو كبيرا، ذكرا كان، أو أنثى، حرا كان، أو عبدا إلا البغاة وقطاع الطريق، ومن بمثل حالهم لقول النبي: صلى الله عليه وسلم صلوا على كل بر وفاجر . الجوهرة النيرة: (1/ 106، ط: المطبعة الخيرية ) الصلاة على الميت ثابتة بمفهوم القرآن قال الله تعالى {ولا تصل على أحد منهم مات أبدا} [التوبة: 84] والنهي عن الصلاة على المنافقين يشعر بثبوتها على المسلمين الموافقين وثابتة بالسنة أيضا قال عليه الصلاة والسلام صلوا على من قال لا إله إلا الله ولا خلاف في ذلك وهي فرض على الكفاية ويسقط فرضها بالواحد .
دارالافتاء جامعہ دارالعلوم حنفیہ (نعمان بن ثابت)