فتوی نمبر : 890
طلاق کو گھر میں رات گزارنے کے ساتھ معلق کرنا

طلاق کو گھر میں رات گزارنے کے ساتھ معلق کرنا

کیا فرماتے ہیں مفتیان کرام اس مسئلہ کے بارے میں کہ ایک آدمی نے اپنی بیوی سے کہا کہ اگر آج رات تو میرے گھر پر رہی تو تجھے وہ طلاق جو خلیفہ ہارون الرشید نے اپنی بیوی کو دی تھی، یہ بات شوہر نے دن کے تین بجے کہی اور بیوی رات کو نو بجے گھر سے نکلی، اب پوچھنا یہ ہے کہ اس طرح سے بیوی پر طلاق واقع ہوئی یا نہیں؟

اَلجَوَابْ بِاسْمِ مُلْہِمِ الصَّوَابْ

واضح رہے کہ طلاق کو کسی شرط کے ساتھ معلق کرنے کی صورت میں اگر شرط پائی جائے تو طلاق واقع ہو جاتی ہے،اگر شرط نہ پائی جائے تو طلاق واقع نہیں ہوتی، لہذا پوچھی گئی صورت میں چونکہ عورت نے رات شوہر کے گھر میں نہیں گزاری تو شرط نہ پائے جانے کی وجہ سے طلاق واقع نہیں ہوگی۔

حوالہ جات

*فتح القدیر:(116/4،ط: دارالفکر)*
وإذا أضافه إلى شرط وقع عقيب الشرط مثل أن يقول لامرأته: إن دخلت الدار فأنت طالق) وهذا بالاتفاق لأن الملك قائم في الحال، والظاهر بقاؤه إلى وقت وجود الشرط.

*البناية شرح الهداية:(413/5،ط: دارالکتب العلمية)*
وإذا أضافه إلى شرط وقع عقيب الشرط، مثل أن يقول لامرأته إن دخلت الدار فأنت طالق، وهذا بالاتفاق.

*الھندية:(420/1، ط:دارالفکر)*
وإذا أضافه إلى الشرط وقع عقيب الشرط اتفاقا مثل أن يقول لامرأته: إن دخلت الدار فأنت طالق.