اچھے اور برے ناموں کا شخصیت پر اثر

واضح رہے کہ اچھا نام انسان کے لیے زینت اور باعثِ عزت ہوتا ہے، عمدہ معنی رکھنے والا نام عموماً لوگوں کے دلوں میں اچھی کیفیت پیدا کرتا ہے، جبکہ برے یا نامناسب معنی والا نام طبیعت پر ناگوار گزرتا ہے اور احادیث میں رسول اللہ صلی اللہ علیہ وسلم نے بچوں کے اچھے اور بامعنی نام رکھنے کا حکم دیا ہے اور اس کو والدین پر بچوں کا حق قرار دیا ہے اور جن ناموں کے معنی اچھے نہیں ہیں یا بے معنی ہیں ایسے نام رکھنے سے منع فرمایا ہے، اسی طرح آپ ﷺ نے برے یا نامناسب معنی رکھنے والے متعدد ناموں کو تبدیل فرما کر ان کی جگہ اچھے اور بامعنی نام رکھے، جس سے معلوم ہوتا ہے کہ اسلام میں اچھے نام کی بڑی اہمیت ہے۔ اس بنا پر یہ کہنا درست ہے کہ اچھے اور بامعنی نام انسان کی شخصیت پر مثبت اثر ڈال سکتے ہیں، تاہم یہ اثر قطعی اور لازمی نہیں ہوتا، یعنی صرف نام ہی کسی انسان کے کردار یا شخصیت کا سبب نہیں بنتا، بلکہ اس کی تربیت، ماحول، دینی تعلیم اور ذاتی اعمال بھی اس میں بنیادی کردار ادا کرتے ہیں، لہٰذا والدین کو چاہیے کہ اپنی اولاد کے ایسے نام رکھیں جو اچھے اور پاکیزہ معنی رکھتے ہوں، سب سے افضل نام عبداللہ اور عبدالرحمن ہیں، جیسا کہ حدیثِ مبارکہ میں ان کی فضیلت وارد ہوئی ہے۔ اس کے بعد انبیائے کرام علیہم السلام، صحابۂ کرام رضی اللہ عنہم اور صالحین کے ناموں پر نام رکھنا بھی مستحسن اور باعثِ برکت ہے۔ لڑکوں کے چند بہترین نام: عبداللہ (اللہ کا بندہ) ،عبدالرحمن (رحمان کا بندہ)، محمد (بہت زیادہ تعریف کیا گیا)، احمد (سب سے زیادہ حمد کرنے والا) ، ابراہیم ،اسماعیل ،یوسف، موسیٰ ،عیسیٰ ،زکریا ،یحییٰ ،عثمان ،عمر ،ابوبکر ،علی ،حسن ،حسین ،طلحہ، زبیر، سعد معاذ، انس،یہ تمام نام شرعاً درست، بامعنی اور عمدہ ناموں میں شمار ہوتے ہیں۔

*صحیح البخاری: (رقم الحدیث: 6190، ط: دار طوق النجاة)* حدثنا إسحاق بن نصر، حدثنا عبد الرزاق، اخبرنا معمر، عن الزهري، عن ابن المسيب، عن ابيه، ان اباه جاء إلى النبي صلى الله عليه وسلم، فقال:" ما اسمك؟" قال: حزن قال:" انت سهل" قال: لا اغير اسما سمانيه ابي قال ابن المسيب: فما زالت الحزونة فينا بعد. *الموسوعۃ الفقھیة: (311/11، ط: دار السلاسل)* الأصل جواز التسمية بأي اسم إلا ما ورد النهي عنه۔۔وتستحب التسمية بكل اسم معبد مضاف إلى الله سبحانه وتعالى، أو إلى أي اسم من الأسماء الخاصة به سبحانه وتعالى؛ لأن الفقهاء اتفقوا على استحسان التسمية به. وأحب الأسماء إلى الله عبد الله وعبد الرحمن. وقال سعيد بن المسيب: أحبها إلى الله أسماء الأنبياء.