فتوی نمبر : 925
بینک سے قسطوں پر گاڑی خریدنا

بینک سے قسطوں پر گاڑی خریدنا

سوال : مفتی صاحب !
بنک سے قسطوں پر گاڑی لینا کیسا ہے

اَلجَوَابْ بِاسْمِ مُلْہِمِ الصَّوَابْ

قسطوں پر کسی چیز کی خرید و فروخت شرعاً جائز ہے، بشرطیکہ معاملہ صاف، واضح اور شرعی اصولوں کے مطابق ہو۔
اس کے جواز کے لیے چند شرائط کی پابندی ضروری ہے:
اوّل: اس چیز کی مجموعی قیمت فریقین کی باہمی رضامندی سے طے کر لی جائے، چاہے یہ قیمت نقد قیمت کے مقابلے میں زیادہ ہی کیوں نہ ہو۔
دوم: قسطوں کی مدت متعین ہو۔
سوم: ہر قسط کی رقم اور ادائیگی کی تاریخ پہلے سے مقرر ہو، تاکہ معاملے میں کوئی ابہام نہ رہے۔
چہارم: اگر خریدار کسی قسط کی ادائیگی میں تاخیر کرے تو اس پر بطورِ جرمانہ اضافی رقم لینے کی شرط نہ رکھی جائے، کیونکہ یہ سود ہے، جو شرعاً ناجائز اور حرام ہے۔
لہٰذا ان شرائط کی رعایت رکھتے ہوئے بینک سےقسطوں پر گاڑی خریدنا جائز ہے، لیکن اگر ان میں سے کوئی شرط ساقط کر دی جائے، یا ان کی خلاف ورزی کی جائے تو معاملہ ناجائز ہو جائے گا۔
موجودہ اسلامی بینک جو مستند علماء کرام کی نگرانی میں چل رہے ہیں اور وہ ان شرائط کو ملحوظ رکھیں تو ایسے بینک سے گاڑی خریدنا جائز ہے، دیگر سودی بینک چونکہ ان شرائط کا لحاظ نہیں رکھتے، اس لیے سودی بینک سے گاڑی خریدنا جائز نہیں ۔

حوالہ جات

المبسوط للسرخسی:13/8،ط: دارالمعرفة
وإذا عقدالعقد على أنه إلى أجل كذا بكذا وبالنقد بكذا أو قال إلى شهر بكذا أو إلى شهرين بكذا فهو فاسد؛ لأنه لم يعاطه على ثمن معلوم ولنهي النبي ﷺ عن شرطين في بيع وهذا هو تفسير الشرطين في بيع ومطلق النهي يوجب الفساد في العقود الشرعية وهذا إذا افترقا على هذا فإن كان يتراضيان بينهما ولم يتفرقا حتى قاطعه على ثمن معلوم، وأتما العقد عليه فهو جائز؛ لأنهما ما افترقا إلا بعد تمام شرط صحة العقد.

مجلة الأحكام العدلية:المادۃ:245،ص:50 مكتبة نور محمد
(المادة 245) ‌البيع ‌مع ‌تأجيل الثمن وتقسيطه صحيح
(المادة 246) يلزم أن تكون المدة معلومة في البيع بالتأجيل والتقسيط
(المادة 247) إذا عقد البيع على تأجيل الثمن إلى كذا يوما أو شهرا أو سنة أو إلى وقت معلوم عند العاقدين كيوم قاسم أو النيروز صح البيع
(المادة 248) تأجيل الثمن إلى مدة غير معينة كإمطار السماء يكون مفسدا للبيع.